Wanneer seks jou identiteit begin dra!

“Alles is my geoorloof.” (1 Kor. 6:12)

Dit klink na vryheid, né? Geen reëls nie. Geen beperkings nie. Leef soos jy wil!

Maar Paulus voeg onmiddellik by:

“Ek gaan my nie deur enigiets laat verslaaf nie.” (1 Kor. 6:12)

En daar lê die probleem. Wat lyk soos vryheid, verander baie maklik in slawerny.

Ons leef in ’n wêreld waar baie mense glo dat hierdie lewe al is wat daar is. Geen groter doel nie. Geen ewige betekenis nie. Maar dan bly daar steeds ’n diep vraag in elke mens se hart: Maak my lewe saak?

As God uit die prentjie verwyder word, moet iets anders daardie plek inneem. En dikwels word seks en romantiese liefde daardie “vervanger-god”.

Ons begin glo:

• “As ek net die regte persoon kry, sal alles reg wees.”

• “As iemand my volkome liefhet, sal ek heel wees.”

Jy hoor dit in hoe mense praat:

• “Jy maak my heel.”

• “Sonder jou is ek niks.”

• “Jy is al wat ek nodig het.”

Dit klink romanties, maar dit is eintlik ’n onmoontlike las om op ’n ander mens te plaas.

Die probleem is nie dat seks of liefde sleg is nie.

Die probleem begin wanneer ons van seks iets maak wat dit nooit bedoel was om te wees nie.

Dis soos om ’n koffiemasjien te koop en te verwag dat dit vir jou tee moet maak. Maak nie saak hoe goed daardie masjien is nie—dit gaan jou elke keer teleurstel.

Net so kan seks nie:

• jou identiteit dra nie,

• jou leegheid vul nie,

• of jou waarde bepaal nie.

Wanneer ons dit probeer, gebeur wat altyd gebeur wanneer ’n goeie ding ’n afgod word: dit begin ons beheer.

Dit wys sigself op verskillende maniere:

• Ons sien die beheer in die behoefte aan konstante seksuele aandag.

• Ons sien die beheer in die vrees om alleen te wees.

• Ons sien die beheer in die gevoel dat jy nie volledig is sonder ’n verhouding nie.

Selfs gesonde verhoudings sal begin kraak onder die gewig van hierdie verwagtings—nie omdat dit die verkeerde persoon is nie, maar omdat geen mens vir jou kan gee wat net God kan nie.

En dit bring ons by die kernvraag: Nie: “Het ek die regte persoon nie?” Maar:

“Is God in die regte plek in my lewe?”

Dink net hoe wonderlik is dit wanneer Christus daardie besonder plek inneem. Hy gee vir ons wat geen mens kan nie!

In Christus word ons ten volle geken en ten volle liefgehê. Sonder maskers. Sonder voorwaardes. Hy ken ons diepste gebrokenheid—en tog maak Hy ons Syne.

En meer as dit: ons is duur gekoop.

Ons waarde word nie bepaal deur:

• wie ons begeer nie,

• of wie ons wil hê nie,

• of wat ander van ons dink nie.

Ons waarde word bepaal deur die prys wat betaal is—en daardie prys was die lewe van Christus.

En wanneer ons dit opreg glo, verander dit alles.

Dit beteken:

• Jy hoef nie meer jou liggaam te gebruik om jou waarde te bewys nie.

• Jy hoef nie meer iemand anders se goedkeuring te soek om volledig te voel nie.

• Jy hoef nie meer in ’n verhouding te soek wat net God kan gee nie.

Jou identiteit rus nie meer op wie jou wil hê nie, maar op Wie jou reeds gekoop het!

En daar—net daar—vind ’n mens ware vryheid.